by Phoe Lone Jun 28, 2024 | News
ဘော်စတွန်မြို့တွင်ကျင်းပသည့် ပြည်သူ့ဂုဏ်ရည်ဂုဏ်ပြုပွဲအခမ်းအနားသို့ ပြည်ထောင်စုဝန်ကြီး တက်ရောက် အမှာစကားပြောကြား
၂၀၂၄ ခုနှစ်၊ ဇွန်လ ၂၈ ရက်
၂၀၂၄ခုနှစ်၊ ဇွန်လ ၂၂ရက်နေ့တွင် ကျရောက်သည့် ၁၅ကြိမ်မြောက် ပြည်သူ့ဂုဏ်ရည်ဂုဏ်ပြုပွဲအခမ်းအနားကို အမေရိကန်ပြည်ထောင်စု၊ ဘော်စတွန်မြို့ နယူးအင်္ဂလန်ဌာနခွဲ၌ ကျင်းပခဲ့ရာ ပြည်ထောင်စုဝန်ကြီး တက်ရောက်အမှာစကားပြောကြားခဲ့ပါသည်။
ပြည်ထောင်စုဝန်ကြီးက ဂုဏ်ပြု အမှာစကားပြောကြားရာတွင် မည်သည့်ကူညီထောက်ပံ့မှုမပါဘဲ အသင်းအဖွဲ့ကြီးကို ၁၅နှစ်တိုင် ထိန်းသိမ်းနိုင်ခဲ့သလို တစ်ကမ္ဘာလုံးရှိ မြန်မာပြည်သူများအတွက် အခန်းကဏ္ဍပေါင်းများစွာကို နိုင်ငံအသီးသီးက မြန်မာများဖြင့် ကျယ်ကျယ်ပြန့်ပြန့် စနစ်တကျ ချိတ်ဆက်ဆောင်ရွက်နိုင်မှုကို ဂုဏ်ယူပါကြောင်း၊ အရည်အချင်းပြည့်မှီစေရန် လူငယ်နှင့်လူကြီးပူးပေါင်းဆောင်ရွက်နေသည့် အသင်းကြီး အောင်မြင်မည်ဟု ယုံကြည်ပါကြောင်း၊ အာဏာသိမ်းစမှစ၍ နယ်စပ်ဒေသတွင်နေထိုင်ကာ အသင်းကြီးအတွက် ပါဝင်နေသူများကို လေးစားဂုဏ်ယူပါကြောင်း၊ ထို့အပြင် အသင်းကြီးအနေဖြင့် စစ်အာဏာရှင်ဆန့်ကျင်ရေးတွင် ယနေ့အချိန်အထိ ပါဝင်ပေးခဲ့ကြသည့်အတွက် လေးစားတန်ဘိုးထားပါကြောင်း ပြောကြားခဲ့ပါသည်။
ပြည်သူ့ဂုဏ်ရည်အသင်းသည် ပြည်ပရောက် မြန်မာပြည်သားများ၏ စုစည်းညီညွတ်မှုဖြင့် မြန်မာနိုင်ငံအတွင်းမှ နာရေးကူညီမှုကဲ့သို့သော လူမှုသူရဲကောင်းများကို နှစ်စဉ်ဂုဏ်ပြုနေသည့် အသင်းကြီးဖြစ်ပါသည်။
အခမ်းအနားတွင် ဦးမင်းကိုနိုင် ရေးဆွဲထားသည့် ပန်းချီကားတစ်ချပ်ကို လေလံတင်ပြီး ရန်ပုံငွေရှာခဲ့ကြကာ ယခုနှစ်အတွက် ပြည်သူ့ဂုဏ်ရည်ဆုကို နွေဦးတော်လှန်ရေးတွင် ပါဝင်နေသော လူငယ်များ၏ တီထွင်ဖန်တီးမှုနှင့် ထုတ်လုပ်သူများအဖွဲ့က ရရှိခဲ့ပါသည်။
ထို့နောက် ဧည့်ပရိသတ်များကို မြန်မာ့အစားအစာများဖြင့် တည်ခင်းဧည့်ခံခဲ့ပြီး နိုင်ငံကျော် CDM ဆိုင်းပညာရှင် မြန်မာပြည်ကျောက်စိမ်းမှ ဆိုင်းဝိုင်းဖြင့် ဖျော်ဖြေခဲ့ပါသည်။
#MoCIT
by Phoe Lone Jun 28, 2024 | News
ဆက်သွယ်ရေး၊ သတင်းအချက်အလက်နှင့် နည်းပညာဝန်ကြီးဌာန CDM ဝန်ထမ်းများ စတုတ္ထ အကြိမ်မြောက် “စိတ်ခွန်အားဖြည့် တွေ့ဆုံပွဲ အခမ်းအနား”ကျင်းပပြီးစီး
ရက်စွဲ။ ။ဇွန် ၁၄၊ ၂၀၂၄။
ဆက်သွယ်ရေး၊ သတင်းအချက်အလက်နှင့် နည်းပညာဝန်ကြီးဌာန (MOCIT)လက်အောက်ရှိ CDM ဝန်ထမ်းများ၏ စတုတ္ထ အကြိမ်မြောက် “စိတ်ခွန်အားဖြည့် တွေ့ဆုံပွဲ အခမ်းအနား”ကို ဇွန်လ ၂ရက်နေ့တွင် Online မှတဆင့် ကျင်းပပြီးစီးခဲ့ပါသည်။
တွေ့ဆုံပွဲကို ပြည်ထောင်စုဝန်ကြီးဦးထင်လင်းအောင် နှင့် ရုံးအဖွဲ့၊ CDM Success Committee မှ တာဝန်ရှိသူများ၊ CDM ဦးစီးအရာရှိ ဦးကျော်သက်လင်း၊ ဗိုလ်ကြီးဟောင်း ဦးနေမျိုးဇင်၊ အဆိုတော် LEO နှင့် (MOCIT) လက်အောက်ရှိ CDM ဝန်ထမ်းများ တက်ရောက်ခဲ့ကြပါသည်။
ရှေးဦးစွာပြည်ထောင်စုဝန်ကြီးက ယနေ့အချိန်ထိ အခက်အခဲများကြားမှ တောင့်ခံပေးနေကြသော CDM ဝန်ထမ်းများကို ကျေးဇူးတင်လေးစားပါကြောင်း၊ စိတ်ဓာတ်မြင့်မြတ်သူတွေထံက မိမိတို့ကသာ စိတ်ခွန်အားပြန်လည်ရယူရမှာဖြစ်ပါကြောင်း၊ CDM လှုပ်ရှားမှုဟာ စစ်ကောင်စီကို တုန်လှုပ်စေတဲ့အထိ အောင်မြင်ခဲ့ပါကြောင်း၊ CDM ဖြင့်သာမက တော်လှန်ရေးအတွင်းကျရာကဏ္ဍတွင် ပါဝင်တိုက်ပွဲဝင်နေကြသည့် ဝန်ထမ်းများကို အထူးလေးစားဂုဏ်ယူပါကြောင်း အဖွင့်အမှာစကားပြောကြားခဲ့ပါသည်။
ဆက်လက်၍ CDM ကိုယ်စားလှယ်တစ်ဦးမှ စိတ်ခွန်အားဖြည့်ပွဲများကို ၄ကြိမ်တိုင် ကျင်းပနိုင်ခဲ့ပြီဖြစ်ပါကြောင်း၊ CDM ကိုယ်စားပြုအဖွဲ့ကိုဖွဲ့စည်းနိုင်ခဲ့ကာ သင်တန်းများပို့ချခြင်း၊ ပညာမျှဝေခြင်းနှင့် သက်ဆိုင်ရာကိုယ်စားလှယ်များမှတဆင့် CDM များကို စုစည်းဆောင်ရွက်လျက်ရှိကြောင်း၊ အနာဂတ်တွင် ပိုမိုကောင်းမွန်သော ဝန်ထမ်းယန္တရားပေါ်ပေါက်လာရေး အထူးအလေးထား ဆောင်ရွက်လျက်ရှိကြောင်း ပြောကြားခဲ့ပါသည်။၊
CDM Success Committee တာဝန်ရှိသူတစ်ဦးမှလည်း ဝန်ထမ်းများက စိတ်ဓာတ်မကျဘဲ ရပ်တည်နေသည်ကို တွေ့မြင်ရ၍ များစွာဝမ်းမြောက်မိပါကြောင်း၊ အားပေးစကားပြောစရာမလိုအောင် ခိုင်မာတဲ့ဇွဲသတ္တိနဲ့ ရှိနေကြသည်ကို ဝမ်းသာမိပါကြောင်း၊ CSC အနေဖြင့်သာမက ဝန်ထမ်းများအချင်းချင်းအတူတကွ လက်တွဲလုပ်ဆောင်စေလိုကြောင်း ပြောကြားခဲ့ပါသည်။
ဗိုလ်ကြီးဟောင်းဦးနေမျိုးဇင်မှ စစ်ကျွန်ဘဝမှ ရုန်းထွက်ကာ လွတ်လပ်သော ကိုယ်ပိုင်ရပ်တည်ချက်ဖြင့် တိုက်ပွဲဝင်နေသူများကို လေးစားဂုဏ်ယူပါကြောင်း၊ တော်လှန်ရေးရေချိန်မြင့်လာသည်နှင့်အမျှ အောင်ပွဲနှင့်နီးကပ်လာပြီဖြစ်ပါကြောင်း၊ မကြာသောကာလမှာ အချင်းချင်းအပြုံးပန်းများဖြင့်တွေ့ဆုံကြရမည်ကို စိတ်ခွန်အားထားကာ ရနိုင်သမျှနည်းလမ်းဖြင့် တော်လှန်ရေးအောင်မြင်ရန် ဆက်လက်ပါဝင်ပေးကြဖို့ စိတ်ခွန်အားဖြည့် တိုက်တွန်းပြောကြားခဲ့ပါသည်။
ဆက်လက်၍ ရဲဘော်ညောင်တုန်းနှင့်အဖွဲ့က တေးဂီတများဖြင့်လည်းကောင်း၊ အဆိုတော် Leo မှ “ယုံကြည်ရာ” သီချင်းဖြင့်လည်းကောင်း၊ CDM ဝန်ထမ်းများမှ ကဗျာများရွတ်ဆို၍လည်းကောင်း ဖျော်ဖြေခဲ့ကြပါသည်။
CDM ဦးစီးအရာရှိ ဦးကျော်သက်လင်းမှ စစ်မှန်သူသာ နောက်ဆုံးမှာ အနိုင်ယူမှာဖြစ်ပါကြောင်း၊ CDM စတင်ဝင်ရောက်စဉ်ကတည်းက အဆုံးသတ်ချိန်ထိပါဝင်ဖို့ ဆုံးဖြတ်ခဲ့ပါကြောင်း၊ ဗလငါးတန်ကို အသုံးပြုမှသာ လက်ရှိကြုံတွေ့နေရတဲ့ အခက်အခဲများကို လွတ်မြောက်နိုင်မည်ဖြစ်ပါကြောင်း အောင်စိတ် အောင်အတွေးဖြင့် ညီညွတ်စွာ စောင့်ထိန်းလုပ်ဆောင်သွားဖို့နှင့် စဉ်းစားတွေးခေါ်တတ်ဖို့လိုပါကြောင်း၊ အတူတကွရှိနေပါကြောင်း အတူကျော်ဖြတ်ကြရမည်ဖြစ်ပါကြောင်း စိတ်ခွန်အားဖြည့်စကားများပြောကြားခဲ့ပါသည်။
ထို့နောက် CDM ဝန်ထမ်းများက သိရှိလိုသည်များကို မေးမြန်းဆွေးနွေးပြီး ပြည်ထောင်စုဝန်ကြီးက ရှင်းလင်းပြောကြားခဲ့ပါသည်။
နောက်ဆုံးအစီအစဉ်အဖြစ် CDM ဝန်ထမ်းများအား ကံစမ်းမဲအစီအစဉ်များဖြင့် ဝန်ကြီးဌာနတာဝန်ရှိသူများမှ ဂုဏ်ပြုချီးမြှင့်ခဲ့ပြီး အခမ်းအနားကို အောင်မြင်စွာရုတ်သိမ်းခဲ့ပါသည်။
#MoCIT
by Phoe Lone Jun 5, 2024 | News
အမျိုးသားညီညွတ်ရေးအစိုးရ (NUG) ၏ ဆက်သွယ်ရေး သတင်းအချက်အလက်နှင့် နည်းပညာဝန်ကြီးဌာနမှ Smart Government Project အစီအစဉ်အရ Go.NUG စနစ်အား မိတ်ဆက်ခြင်း
ပြီးခဲ့သည့်နှစ်များအတွင်း NUG မှ အချက်အလက်ကောက်ယူသော Form များ ပေးပို့ခြင်းနှင့် သတင်းလင့်ခ်များပေးပို့ခြင်းကို ကြိမ်ဖန်များစွာ ပြုလုပ်ခဲ့ကြရပါသည်။ မူရင်းလင့်ခ်များသည် လွန်စွာရှည်လျားသည့်အတွက် Social Media များတွင် ပြန်လည်ကူးယူ ဖြန့်ဝေရန် ခက်ခဲပါသည်။ ထို့အတွက်ကြောင့် အလွယ်တကူရရှိသည့် လင့်အတိုပြုလုပ်ပေးသော အခမဲ့ပလက်ဖောင်းများ အခပေးပလက်ဖောင်းများကို အသုံးပြုပြီး လင့်ခ်အတိုများကို ဖြန့်ဝေခဲ့ကြရပါသည်။
မူရင်းလင့်ခ်မှလွဲ၍ အခြားလင့်ခ်အတိုများသည် အမျိုးမျိုးသော ပလက်ဖောင်းများမှ မတူညီသော လင့်ခ်အမည်များရှိနေခြင်းကြောင့် NUG မှ ပြုလုပ်ထားကြောင်း အတည်ပြုရန် ခက်ခဲပါသည်။ အလွယ်ရရှိသော လင့်ခ်အတိုကောက်များကို အသုံးပြုခြင်းဖြင့် မသမာသူများက NUG၏ တရားဝင်လင့်ခ်ကဲ့သို့ အယောင်ဆောင်၍ အချက်အလက်များကို လိမ်လည်ရယူနိုင်ပါသည်။ အထူးသဖြင့် Google Form များသည် Gmail အသုံးပြုသည့် မည်သူမဆို အသုံးပြုနိုင်သည့်အတွက် မသမာမှုတစ်ခု ပြုလုပ်ရန် လွန်စွာ လွယ်ကူပါသည်။
ထိုအခြေအနေများကို ဖြေရှင်းနိုင်ရန်အတွက် ဆက်သွယ်ရေး သတင်းအချက်အလက်နှင့် နည်းပညာဝန်ကြီးဌာန IT & Cyber Security Department မှ SmartGov Team သည် Go.NUG စနစ်ကို အကောင်အထည်ဖော်ခဲ့ပါသည်။ အစိုးရမှပေးပို့သည့် လင့်ခ်များ (URL များ) သည် go.nugmyanmar.org မှစတင်ရမည်ဖြစ်ပြီး လိမ်လည်သူများသည် အဆိုပါလင့်ခ်များကို ပုံတူပွား၍ မရနိုင်ရန် NUG ဝန်ကြီးဌာနများမှလွဲ၍ အခြားမည်သူမှ go.nugmyanmar.org မှ လင့်ခ်များ ထုတ်၍မရနိုင်ရန် ပြုလုပ်ထားပါသည်။
သို့ဖြစ်ပါ၍အမျိုးသားညီညွတ်ရေးအစိုးရ နှင် အစိုးရဝန်ကြီးဌာနများမှ ပေးပို့သည့် လင့်ခ်များအားလုံးသည် go.nugmyanmar.org မှသာ စတင်ရမည်ဖြစ်ပြီး Go.NUG မှတဆင့် မသွားသော လင့်ခ်အတိုများသည် ရာနှုန်းပြည့် လုံခြုံစိတ်ချရသော လင့်ခ်များ မဟုတ်သောကြောင့် လင့်ခ်များကိုဖွင့်မကြည့်သင့်ပါကြောင်း အသိပေးအပ်ပါသည်။
အသေးစိတ်ကို info.go.nugmyanmar.org တွင် ဝင်ရောက်လေ့လာနိုင်ပါသည်။ ပြည်သူများအနေဖြင့် အစိုးရနှင့် ဆက်စပ်သောလုပ်ငန်းများမှ ပေးပို့လာသော လင့်ခ်များ (URL များ) ကို စိတ်ချယုံကြည်စွာ အသုံးပြုနိုင်ရန်အတွက် Go.NUG ကို မိတ်ဆက်လိုက်ပါသည်။
ဆက်သွယ်ရေး၊ သတင်းအချက်အလက်နှင့် နည်းပညာဝန်ကြီးဌာန
VIDEO
#nug
by Phoe Lone Jun 5, 2024 | News
အမျိုးသားညီညွတ်ရေးအစိုးရ (NUG) ၏ ဆက်သွယ်ရေး သတင်းအချက်အလက်နှင့် နည်းပညာဝန်ကြီးဌာန (MOCIT) မှ nugmyanmar.org website အား အမြင်သစ်ဖြင့် မိတ်ဆက်ခြင်း
၂၀၂၄ ခုနှစ်၊ ဇွန် ၅ ရက်
ယနေ ဇွန်လ ၅ ရက်နေ့သည် ဆက်သွယ်ရေး၊ သတင်းအချက်အလက်နှင့် နည်းပညာဝန်ကြီးဌာန ဖွဲ့စည်းခြင်း ၃ နှစ်ပြည့်မြောက်နေ့ဖြစ်ပါသည်။ ၃ နှစ်ပြည့် နှစ်ပတ်လည်နေ့တွင် အမျိုးသား ညီညွတ်ရေးအစိုးရ၏ nugmyanmar.org website အား အမြင်သစ် ပုံစံသစ်ဖြင့် features အသစ်များထည့်ကာ ပြုပြင်ထားပါသည်။ nugmyanmar.org မှ တဆင့် ဝန်ကြီးဌာနများ၏ websites များကိုသွားရန် မူလ website ပုံစံမပြောင်းစေရန် Ministry Menu တွင်ထည့်သွင်းထားပါသည်။
ဆက်သွယ်ရေး၊ သတင်းအချက်အလက်နှင့် နည်းပညာဝန်ကြီးဌာန
by Phoe Lone May 5, 2024 | News
အမျိုးသားညီညွတ်ရေးအစိုးရ ဖွဲ့စည်းခြင်း (၃) နှစ်ပြည့်တွင် ဝန်ကြီးဌာန၏ လုပ်ငန်းမှတ်တမ်း
၂၀၂၄ ခုနှစ်၊ ဧပြီ ၁၈
ဆက်သွယ်ရေး၊ သတင်းအချက်အလက်နှင့် နည်းပညာဝန်ကြီးဌာန၏ ၃ နှစ်တာ ဆောင်ရွက်အောင်မြင်ခဲ့သော လုပ်ငန်းများနှင့် ဆက်လက်ဖော်ဆောင်မည့် လုပ်ငန်းစဉ်များကို ပြည်ထောင်စုဝန်ကြီး ဦးထင်လင်းအောင်မှ ပြည်သူများသို့ အသိပေး ပြောကြားခဲ့ပါသည်။ ဝန်ကြီး၏ ပြောကြားချက်တချို့မှာ
– အမျိုးသားညီညွတ်ရေးအစိုးရ၏ ဝန်ကြီးဌာနအသီးသီး၊ တော်လှန်ရေးအင်အားစုများ၊ ရုံးအဖွဲ့ဝင်များနှင့် ပြည်သူ့အုပ် ချုပ်ရေးအဖွဲ့များသို့ Satellite Internet Terminal များ၊ Satellite Phone များ၊ StarLink များ၊ Radio Mobile & HandHeld များနှင့် အခြားသော ဆက်သွယ်ရေးပစ္စည်းများအား ထောက်ပံ့တပ်ဆင်ပေးနိုင်ခဲ့ခြင်း။
– ဆက်သွယ်ရေးမြေပြင်တာဝန်ခံများ၊ ပြည်သူ့ကာကွယ်ရေးတပ်ဖွဲ့ဝင်များ၊ EAOs များနှင့် အခြားမိတ်ဖက်အဖွဲ့အစည်း များအား ဆက်သွယ်ရေး စက်ပစ္စည်းများ အသုံးပြုသင်တန်း၊ မြေပြင်အနေအထားအလိုက် ဆက်သွယ်ရေးတပ်ဆင်အသုံးပြုသင်တန်း စသည့် အဆင့်မြင့် ဆက်သွယ်ရေးနည်းပညာ သင်တန်းများအား ပို့ချပေးနိုင်ခဲ့ခြင်း။
– ကောလင်းမြို့နယ် အရေးပေါ်ထိန်းသိမ်းရေး လုပ်ငန်းအတွက် ဆသ်သွယ်ရေးလုပ်ငန်းများ၊ ရုံးပိုင်းဆိုင်ရာလုပ်ငန်း များ ဆောင်ရွက်ပေးနိုင်ခဲ့ခြင်း။ – အရေးပေါ်အုပ်ချုပ်ရေး စီမံခန့်ခွဲမှုဆိုင်ရာလုပ်ငန်းလမ်းညွှန်ချက်ပါ နံပါတ် (၁၄) နှင့်အညီ အရေးပေါ်ကာလတွင် ဆက်သွယ်ရေး မပြတ်တောက်စေရန်အတွက် ဝန်ကြီးဌာနမှတာဝန်ရှိသူများ၊ MOCIT မှ ခရိုင်တာဝန်ခံများ၊ ခရိုင် ပေါင်းစပ်ညှိ နှိုင်းရေးကော်မတီမှ တာဝန်ခံများနှင့် တွေ့ဆုံ ဆွေးနွေးခြင်း။
– Federal Net Campaing ကို ၂၀၂၃၊ နိုင်ဝင်ဘာ (၂၀) ရက်မှ ၂၀၂၄၊ ဇန်နဝါရီ (၁၅) ရက်ထိ လုပ်ဆောင်ခဲ့ပြီး – Federal Net ကွန်ယက် ဖြန့်ကျက်ထားနိုင်မှု မြို့နယ် (၁၂) မြို့နယ်၊ ကျေးရွာ (၁၆) ရွာ ရှိ – မြို့နယ်များ၊ တိုက်နယ်များ၊ ရပ်ကျေးများအထိ ဝန်ကြီးဌာနမှ ထုတ်ပြန်ထားသည့် သတင်းအချက်အလက်များအား ပြန်ကြားပေးခြင်း၊ အစိုးရမှထုတ်ပြန်သည့်မူဝါဒများ၊ လုပ်ငန်းစဉ်များ၊ ပေါ်လစီများကို အောက်ခြေလူထုကြား ကျယ်ကျယ်ပြန့်ပြန့် ပြန့်နှံ့နိုင်ရန် ထပ်ဆင့်လုပ်ဆောင်ပေးခြင်း၊ လူထုသိလိုသည့် မေးခွန်းများကိုဖြေကြားခြင်း၊ လူထုနှင့် ဌာနအကြား ပေါင်းကူးဆက်သွယ်ပေးခြင်း၊ အရေးပေါ်ကျရောက်နိုင်မည့် လေကြောင်း အန္တရာယ်၊ လက်နက်ကြီးနှင့် စစ်ကြောင်းထိုးမှု အခြေအနေကိစ္စရပ်များ၊ လုံခြုံရေးကိစ္စရပ်များအား ပြည်သူများအချိန်နှင့် တပြေးညီသိရှိ လိုက်နာဆောင်ရွက်နိုင်စေရန် နှိုးဆော်ခြင်း၊ သတင်းထုတ်လွှင့်ခြင်းလုပ်ငန်းများအပြင် အခြားလိုအပ် သည့် ပြန်ကြားရေးနှင့် ပြည်သူ့ဆက်ဆံရေးလုပ်ငန်း ကိစ္စရပ် များဆောင်ရွက်ရန်ဖွဲ့စည်းထားခြင်း။
– Radio NUG သည် နံနက် ၈:၃၀ မှ ၉:၀၀ တစ်ကြိမ်၊ ည ၈:၃၀ မှ ၉:၀၀ တစ်ကြိမ်ဖြင့် တစ်ကြိမ်လျှင် နာရီဝက်နှုန်း ထုတ်လွှင့် ပေးလျက်ရှိပြီး။ – BOSC မှ Media Outlet တစ်ခုအနေဖြင့် MMTV သတင်းဌာနကို ထားရှိပြီး အင်္ဂလိပ်ဘာသာဖြင့် သတင်းများနှင့် ရုပ်သံများကို Facebook စာမျက်နှာနှင့် YouTube Channel တို့တွင် ထုတ်လွှင့်လျက်ရှိပြီး။
– အမျိုးသားညီညွတ်ရေးအစိုးရ၏ မဟာဗျူဟာဆက်သွယ်ရေးနှင့် ပြည်သူ့ဆက်ဆံရေးအဖွဲ့ (SCPRU) ကို ၂၀၂၃ ခုနှစ် ဒီဇင်ဘာ လ (၂၇) ရက်နေ့တွင် စတင်ဖွဲ့စည်းခဲ့ပြီး။
– ဒီဂျယ်တယ်ကာကွယ်ရေးနှင့် ဆိုက်ဘာလုံခြုံရေးဆိုင်ရာ မူဝါဒများအား ဖော်ဆောင်ပေးနိုင်ခြင်း။
– MOHAI အတွက် မွေးစားရင်း Birth Certificate ထုတ်နိုင်ရန် Online Form တခု ပြုလုပ်ပေးခဲ့ပြီး နိုင်ငံရပ်ခြားတွင် မွေးဖွားသည့် မြန်မာနိုင်ငံသားများအား Birth Certificate ထုတ်ပေးနိုင်ခဲ့ပါသည်။
– CDM များလစဉ်ထောက်ပံ့ပေးနိုင်ခဲ့ – CDM များအတွက် “စိတ်ခွန်အားပြည့်တွေ့ဆုံပွဲ” များ ပြုလုပ်ပေးနိုင်ခဲ့ခြင်းတို့ ပြုလုပ်နိုင်ခဲ့ပါသည်။
VIDEO
by Phoe Lone May 5, 2024 | News
အမျိုးသားညီညွတ်ရေးအစိုးရ ဆက်သွယ်ရေး၊ သတင်းအချက်အလက်နှင့် နည်းပညာဝန်ကြီးဌာန ပြည်ထောင်စုဝန်ကြီး၊ နိုင်ငံခြားရေး ဒုဝန်ကြီး၊ သံအမတ်ကြီးနှင့် တာဝန်ရှိသူများသည် Charlotte မြို့မှ ဒေသခံမြန်မာတိုင်းရင်းသားများနှင့် တွေ့ဆုံ
၂၀၂၄ ခုနှစ်၊ မေ ၅
အမေရိကန်ပြည်ထောင်စု မြောက်ကယ်ရိုလိုင်းနားပြည်နယ် Charlotte မြို့မှာ အမျိုးသားညီညွတ်ရေးအစိုးရ ဆက်သွယ်ရေး၊ သတင်းအချက်အလက်နှင့် နည်းပညာဝန်ကြီးဌာန ပြည်ထောင်စုဝန်ကြီး ဦးထင်လင်းအောင်၊ နိုင်ငံခြားရေး ဒုဝန်ကြီး ဦးမိုးဇော်ဦး၊ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းတို့နှင့် မြန်မာတိုင်းရင်းသားများက မေလ ၄ ရက်နေ့မှာ တွေဆုံခဲ့ကြသည်။
တွေ့ဆုံပွဲသို့ တက်ရောက်လာသူများကို NUG ဝန်ကြီးများနှင့် သံအမတ်ကြီးတို့မှ နှုတ်ခွန်းဆက်စကားပြောကြားပြီး နွေဦးတော်လှန်တော်လှန်ရေး၏ လက်ရှိအခြေအနေများကို ရှင်းလင်းတင်ပြခဲ့ကြသည်။
တက်ရောက်လာသူများကလည်း တော်လှန်ရေးနှင့်ပတ်သက်သော မေးခွန်းများ၊ NUG အစိုးရ၏ လုပ်ဆောင်နေမှုများနှင့် ပတ်သက်သောမေးခွန်းများကိုမေးမြန်းကြပြီး တာဝန်ရှိသူများက ပြန်လည်ဖြေကြားခဲ့ကြပါသည်။
Recent Comments